Randakápuna heklaði ég að beiðni dóttur minnar sem langaði í litríka “kósípeysu”. Röndótt er í uppáhaldi hjá mér, ég elska að setja saman marga liti. Rendurnar í kápunni eru óreglulegar og litirnir tólf talsins. Takið eftir því að ermarnar eru ekki eins.
Hægt er að stytta eða síkka peysuna og að sjálfsögðu ætti hver og einn að nota sína uppáhaldsliti. Það er auðvelt því garnið fæst í meira en 70 litum. Athugið að talsvert tognar á kápunni við notkun, sérlega á lengdina. Takið tillit til þess við val á stærð. Einnig er auðvelt að aðlaga uppskriftina vaxtarlagi með því að velja t.d. ermalengd í minni stærð en bolinn o.s.frv.